Iniciativa pol Asturianu sigue faciendo por meyorar la so comunicación cola emisión del programa radiofónicu mensual que da anuncia de les actividaes de la organización. El programa llámase Iniciativa pol Asturianu nes ondes y ta dirixíu por Samuel Gradín. Nesta séptima entrega falamos con Xurde Morán, Periodista; Juan Carlos García Hoyuelos, escritor; Rubén Llames, Secretariu d'Iniciativa pol Asturianu; Inaciu Galán falando del conceyu cola Fundación Príncipe d'Asturies y delles informaciones más, como la presentación del III Cursu d'Asturianu en Xixón.
El grupu de cuentacuentos y representaciones "El prau de mio pá", del que formen parte dalgunos militantes de la organización, entama esti sábadu 22 d'avientu un cuentacuentos n'asturianu inspiráu na figura de L'Anguleru, un personaxe creáu pola asociación "Garabuxada" en 2008 (L'Arena, Sotu'l Barcu) basáu na tradición asturiana, como alternativa a Papá Noel.
Dempués d'un añu d'actividá, Iniciativa pol Asturianu sigue medrando ensin parar nes redes sociales. En Facebook más de 1.000 amigos yá mos siguen nes redes sociales, lo que supón cuasi 3 amigos nuevos cada día dende l'entamu de la páxina nesta rede. En Twitter, Iniciativa pol Asturianu ta cerca de los 750 siguidores, dempués de más de 2.100 tuits asoleyaos nesti tiempu.
Iniciativa pol Asturianu, como asociación que trabaya pola defensa y promoción de la llingua asturiana, una llingua minoritaria europea, quier amosar el so más fonderu sofitu a la iniciativa entamada por 'Progetu Repùblica' de Cerdeña pa pidir que la rede social Facebook permita l'emplegu del sardu nel so web.
Dende esti xueves pasáu los autobuses de Xixón vuelven a llevar la toponimia oficial na so cartelería, mesmo nos vehículos que nos indicadores dixitales de les paraes, dempués de dellos meses nos que, ensin dar nengún tipu d’esplicación, EMTUSA dexó d’usar la toponimia asturiana tradicional, oficial en Xixón dende 2006 col alcuerdu de tolos grupos políticos del plenu.
Iniciativa pol Asturianu organiza un Mercadín de llibros n'asturianu esti martes, miércoles y xueves, 18, 19 y 20 d'avientu de 2012 de 5 a 9 de la tarde. El puestu tará nel Conseyu de Mocedá de Xixón, asitiáu nel 68 de l'Avenida Manuel Llaneza. Nel mesmu van poder atopase llibros n'asturianu dende 2 euros y el nuesu Mapa de parroquies d'Asturies. Los fondos van destinase al llabor d'Iniciativa pol Asturianu.
Nestes fiestes, sé orixinal; Felicita n'asturianu! ¿Quies escribir una felicitación pa los tos amigos, familiares, na to empresa... pero nun fales asturianu o tienes duldes sobre cómo facelo? Dende Iniciativa pol Asturianu ayudámoste a facelo. Fai que más xente conoza l'asturianu, descarga esta imaxe y compártila en redes sociales. Apurrímoste dalgunes fórmules básiques pa felicitar.
Iniciativa pol Asturianu refuga dafechu los planes de la conseyera d'Educación y Cultura, Ana González, que van suponer un ataque al texíu asociativu y empresarial que s'espresa en llingua asturiana. Cuéntase con desaniciar les llinies de sovenciones en concurrencia competitiva p'asociaciones, empreses y p'actividaes cinematográfiques, dalgo que se fizo d'espaldes a tol coleutivu asturfalante y ensin posibilidá nenguna de negociación.
L’Alcaldía del Conceyu de Xixón, púnxose en contactu al traviés de carta (de 25/10/2012) pa responder a la reclamación presentada por Iniciativa pol Asturianu énte’l rexistru del Conceyu dempués de que los autobuses de Xixón, de la compañía pública EMTUSA, dexaren d’usar en paraes y nos indicativos de los vehículos la toponimia oficial dende l’añu 2006, con casos como “Les Mestes”, que volvió al derogáu topónimu “Las Mestas” o “El Cerilleru”, que pasó a ser “Cerillero”.
Como cada mes, Iniciativa pol Asturianu apurre información de la so actividá a socios y simpatizantes de la organización al traviés del so Boletín informativu dixital. Esti boletín ufre información completa de l'actividá de la organización a lo llargo del mes, asina como l'avance de dalgunes cuestiones futures. Puedes apuntate con namás introducir el to corréu nel estoyu al final d'esta páxina. Puedes lleer el númberu 13 equí.