Iniciativa pol Asturianu fixo entrega na mañana de güei, al traviés del vocal de la organización Inaciu Galán, del títulu d’Embaxador de la Llingua Asturiana a Robin Munby.
Munby nació nel añu 1991 na ciudá inglesa de Liverpool y angüaño vive en Madrid. Estudió’l grau de Llingües Modernes, especializándose en castellán, rusu y portugués, na Universidá de Sheffield, continuando la formación depués con un máster de Traducción na Universidá de Glasgow.
Dedícase profesionalmente a la traducción y cuenta con espublizaciones lliteraries na ‘Glasgow Review of Books’, ‘Wasafiri, Subtropics’ y ‘Cambridge Literary Review’ y escribió tamién pa otres revistes científiques como ‘Reading in Translation y Asymptote’.
El nuevu Embaxador de la Llingua Asturiana establecióse n’España va cinco años, siendo consciente de la realidá plurilingüe del país. Nel tiempu d’andanciu del covid, interesóse pola situación de la llingua asturiana, decidiéndose a deprender l’idioma al traviés de los cursos d’Iniciativa pol Asturianu.
Amás, esti nomamientu vien avaláu tamién pol so trabayu como traductor lliterariu d’obres del asturianu al inglés. Esta xera conviértese nun trabayu inéditu pal nuesu idioma que llogra aporta-y normalidá y visibilidá.
Iniciativa pol Asturianu acuta esta distinción honorífica d’Embaxador/a de la Llingua Asturiana pa les persones que, non siendo asturianes o de territorios del dominiu asturllionés, tienen una trayectoria destacada como activistes en defensa de la llingua asturiana en distintos ámbitos y mui especialmente con iniciatives que permitan al asturianu facese presente n’ámbitos internacionales, ganar reconocencia y espacios de visibilidá.
