Esti xueves 6 de febreru, represenantes del colectivu Iniciativa pol Asturianu van aconceyar con Teresa Sanjurjo, directora de la Fundación Príncipe d'Asturies, nel llar d'esta entidá n'Uviéu. El conceyu celébrase un añu dempués de los primeros contactos ente les dos organizaciones, cuando dende Iniciativa pol Asturianu se-y solicitó a la entidá organizadora de los Premios Príncipe d'Asturies que la llingua asturiana tuviere presencia na so actividá.


La Fundación dio apocayá los primeros pasos, cola publicación de les bases del Premiu al Pueblu Exemplar d'Asturies n'asturianu y gallego-asturianu, fechu qu'anque foi tímidu, calificóse como perpositivu dende Iniciativa pol Asturianu.

La organización de reivindicación llingüística quier agora afondar cola entidá pa que dea más pasos nel camín d'usar la llingua asturiana, sobre manera nos actos más destacaos de la Fundación, onde la presencia del asturianu pue tener una mayor repercusión.

Nel conceyu, los miembros de la organización fadrán propuestes concretes a la Fundación, tratando de qu'ésta vea como daqué normal na so actividá, como entidá asitiada n'Asturies, l'usu del asturianu, como yá faen usu, por exemplu, na so páxina web, d'un piñu de llingües de distintos llugares del mundu.