Una presentación de la revista lliteraria Formientu celebrada esti llunes 16 d'abril na Sociedá Cultural Xixonesa sirvió pa recaldar fondos pa Iniciativa pol Asturianu, al traviés de la donación de la cantidá ingresada pola venta de les revistes. L’escritor y hestoriador Javier Cubero de Vicente presentó l’actu, nel que’l director de Formientu, Inaciu Galán, faló de los cinco años de la revista, faciendo repás a l’activida de la mesma nos diez númberos que lleva espublizaos.
Na so intervención, Inaciu Galán, tamién presidente d'Iniciativa pol Asturianu, aprovechó la ocasión y animó a los asistentes a facese socios de la organización "na que trabayamos por construyir un futuru meyor pa la llingua asturiana". Voluntariáu de la organización repartió materiales ya informó al públicu interesáu.
