La organización tamién pidió a la dirección de La Vuelta qu’usen l’asturianu nos materiales de la hestórica prueba

UVIÉU, 18/04/2012. Iniciativa pol Asturianu ta acabante ponese en contactu cola dirección de la La Vuelta a Asturies 2012 pa reclama-yos qu’usen la toponimia oficial nos materiales, páxina web, etc. de la hestórica prueba ciclista asturiana. Dende Iniciativa pol Asturianu nun podemos tar tan contentos del usu que se ta faciendo na vuelta de la cuestión llingüística. Iniciativa pol Asturianu púnxose tamién en contactu cola Dirección Xeneral de Política Llingüístca del Gobiernu d’Asturies, patrocinador del eventu, pa que faiga cumplir la normativa no que cinca al usu toponímicu.

 

Per un llau nun podemos entender como La Vuelta a Asturies fai un usu incorrectu de la toponimia nos llugares pelos que pasa (Gijón/Xixón, La Pola Siero, Piedrasblancas, Llastres, El Fitu, Llugones, Mucó, etc.), cuando son les úniques formes oficiales, y amás, La Vuelta a España, organizada dende fuera d’Asturies, yá anunció, diba usar de forma normal.

 

Amás, pa Iniciativa pol Asturianu, La Vuelta a Asturies, como eventu organizáu n’Asturies habría usar tamién l’asturianu na so cartelería, publicidá, etc. Sedría un xestu mui bien recibíu polos asturianos qu’ayudaría a promocionar l’usu del asturianu nel ámbitu deportivu, nun campu, como’l ciclista onde l’asturianu siempres tuvo mui presente.

 

Por ello Iniciativa pol Asturianu solicitó a la organización de La Vuelta Asturies que proceda a facer los cambios pa respetar la toponimia oficial asturiana pelos llugares pelos que pasa y entame a usar l’asturianu nos sos materiales, web, etc. dende esta mesma edición, incluyendo’l nome del propiu eventu. Otros eventos de calter internacional celebraos n’Asturies, como’l Mundial de Duatlón celebráu en Xixón, yá usaron l’asturianu con total normalidá nel pasáu.

 

Dende Iniciativa pol Asturianu ufrimos la nuesa collaboración pa poner en marcha estes midíes, y quedamos a la disposición de la organización pa ello.