Na tarde del pasáu 4 de marzu inauguróse n'Uviéu'l primer Cursu d'Asturianu d'Iniciativa pol Asturianu. Ufrimos equí les pallabres d'apertura a les que dio llectura Inaciu Galán, presidente de la organización, que xunto al presidente del Conseyu de Mocedá del Principáu d'Asturies, Marcelino Sánchez, inauguraron el cursu.
Mui bones a toos y toes:
Tamos equí, inaugurando la que ye la primer edición del Cursu d’Asturianu n’Uviéu d’Iniciativa pol Asturianu, en collaboración cola Academia de la Llingua Asturiana.
Préstamos comprobar, una vegada más, que los asturianos demanden estos cursos y que la matriculación foi un ésitu. Nós, que llevamos por lema “El futuru del asturianu depende de TI”, entendemos que’l facer l’esfuerciu de deprender l’idioma ye básico, la meyor forma de poder defendelu dempués nel día a día.
Y ye qu’usando l’asturianu, con normalidá, en tolos ámbitos de la vida, ye como meyor podemos da-y futuru a la nuesa llingua.
Entamáis esti cursín y sois pioneros, pero en Xixón llevamos yá llargu tiempu organizando estos cursos, vamos entamar ensiguida la cuarta edición y la esperiencia ye mui positiva. Tamos seguros de qu'equí, na capital d'Asturies, va repitise l'ésitu algamáu na villa de Xovellanos.
Venís a esti cursu a recuperar la vuesa llingua. Dalgunos yá tendréis un bon nivel al entamu, otros non, pero toos, como asturianos tais recuperando la vuesa llingua. Una ayalga impresionante que mos dexaron los nuesos antepasaos, una llingua milenaria que yo comparo con una xoya familiar que llega un pocoñín estropiada, pero qué facemos, ¿tirámosla a la basura? Non, restaurámosla, sacámos-y brillu y llucímosla con arguyu, con ciñu.
Nel peor de los casos tendréis la suerte de llegar sabiendo cientos de pallabres y espresiones d'esta llingua, en dalgunos casos miles, aprovechái esi asturianu que sentís en casa, na cai, en pueblu, quitái'l mieu a usar l'asturianu en tolos ámbitos de la vida.
Nun quiero dexar d’agradecer al Conseyu de la Mocedá del Principáu d’Asturies, equí representáu na figura del so presidente Marcelino Sánchez, la so collaboración pa con nós, cola cesión d'estes nueves y perguapes instalaciones, y por supuestu a l’Academia de la Llingua Asturiana. Amás d’a vosotros, alumnos, yá seya en presencia o na modalidá en llinia, que sois los protagonistes y los que facéis posible que s’entame esta esperencia.
Dende Iniciativa pol Asturianu esperamos seya un ésitu y nun seya más que l’entamu d’otros munchos cursos n'Uviéu.
Muncha suerte nel camín y munches gracies.
Inaciu Galán y González
Presidente d'Iniciativa pol Asturianu
