La Dirección Xeneral de Carreteres del Gobiernu d'Asturies ta acabante instalar nueves señales viales colos nomes de Lieres, Nava, L'Infiestu y Les Arriondes nel enllaz de l'autovía A-8. Iniciativa pol Asturianu denunció qu'estes señales usen los topónimos yá derogaos "Infiesto" y "Arriondas", en cuenta de los únicos oficiales y d'obligáu usu pola alministración L'Infiestu y Les Arriondes.
Pa Iniciativa pol Asturianu esti ye un nuevu ataque a la recuperación y normalización de la toponimia tradicional asturiana, y rescampla n'especial dempués de que la Conseyera de Cultura reclamara al Ministeriu de Fomentu l'usu d'esta toponimia qu'agora vemos que nun cumple siempres el so Gobiernu.
Si bien ye cierto que nes carreteres nueves el Gobiernu d'Asturies vien cumpliendo col usu de la toponimia oficial, esti ye un exemplu de lo qu'Iniciativa pol Asturianu califica como inalmisible pasu atrás.
Por ello solicitóse al traviés de carta a la Dirección Xeneral de Carreteres el cambiu inmediatu d'estes señales, esperando que se trate namás d'un erru temporal, al mesmu tiempu que se-y solicitó, tamién vía postal, a los alcades de Piloña y Parres, Carmen Barrera y Marcos Gutiérrez Escandón que reclamen dende les sos instituciones l'usu de los nomes de llugar que ficieron oficiales los propios plenos de dambos conceyos.
(La semeya ye d'El Comercio)
