Iniciativa pol Asturianu concede esta distinción honorífica pa les persones que, nun siendo asturianes o de territorios del dominiu asturllionés, tienen una trayectoria importante como activistes en defensa del idioma
Stuckwisch reclamó un esfuerciu pa declarar la oficialidá y llogar salvar l’idioma
Iniciativa pol Asturianu fixo entrega esta tarde al traviés d’Inaciu Galán, vocal de rellaciones institucionales ya internacionales de la organización, del títulu d’embaxador de la Llingua Asturiana a Matthew Stephen Stuckwisch.
La organización concede esta distinción honorífica pa les persones que, nun siendo asturianes o de territorios del dominiu asturllionés, tienen una trayectoria importante como activistes en defensa del idioma como ye esti casu.
Matthew Stephen Stuckwisch ye llicenciáu en filoloxía hispánica ya belles artes pola Universidá d’Alabama, máster en filoloxía pola Universidá d’Auburn, ya doctor en filoloxíes hispánica ya lusófona pola Universidá de Tenesí, Knoxville.
Stuckwisch dedícase a la docencia como profesor na Universidá de Tenesí en Chattanooga.
El nuevu Embaxador de la Llingua Asturiana tien interés pol asturianu dende’l 2008 cuando vivía con un asturfalante en Madrid, onde conoció la situación del idioma. Participó nes convocatories de la UABRA yá en cuatro ocasiones de magar l’añu 2016.
Nel actu, nel que participaron varios representantes d’Iniciativa pol Asturianu, el nuevu embaxador de la llingua asturiana agradeció’l nomamientu y reclamó la oficialidá. “Ye’l momentu de declarar la oficialidá del idioma y llograr salvar l’idioma. L’asturianu ye una herencia cultural y tien que tar protexía poles instituciones” apuntó Stuckwisch.
Matthew Stephen Stuckwisch xúnese a la llista de los y les embaxadores Juan Carlos García Hoyuelos y Eva Cameán Pensado.
Declaraciones de Matthew Stephen Stuckwisch:
Declaraciones d’Inaciu Galán, vocal de rellaciones institucionales ya internacionales d’Iniciativa pol Asturianu:
