El periodista y activista Inaciu Galán, vocal d’Iniciativa pol Asturianu, participa güei y mañana nel Europe’s National Minorities: Ways Forward for Minority Protection ‘Ewald Ammende’ International Expert Conference que se celebra en Bruseles entamáu por la Unión Federal de Nacionalidaees Europees (FUEN). L’eventu busca estudiar les cada vegada mayores restricciones al uso de llingües minorizaes en dalgunos países europeos y buscar soluciones dende los ámbitos internacional y européu.
“Les xornaes axunten a espertos de delles comunidaes llingüístiques d’Europa pa estudiar acciones que solucionen la situación d’angüaño de les llingües y ver qué propuestes pueden facese a la Xunión Europea, a los estaos y a la ONU, ente otres instituciones”, apuntó Inaciu Galán.
En 2021, la Comisión Europea negóse a entamar acciones lexislatives sobre cualesquier de les propuestes de la Iniciativa Ciudadana Europea Minoritaria SafePack. En 2023, la conclusión del Tribunal Européu de Drechos Humanos de que la educación nuna llingua minoritaria –y el conteníu del Conveniu Marcu pa la Protección de les Minoríes Nacionales– nun formen parte de “un consensu européu”. Estes son sólo dalgunes de les recientes evoluciones negatives nel ámbitu de la protección de les minoríes n’Europa. Seguramente, podemos afirmar que la protección de los drechos de les minoríes nun se ta estancando n’Europa, sinón que ta claramente retrocediendo. Esto ye sorprendente na midida en que tolos exemplos de bona protección de les minoríes n’Europa amuesen que traxeron paz y prosperidá y, polo tanto, representen una ventaya non sólo pa la minoría en cuestión, sinón pa tol Estáu otorgante y que’l respetu de los drechos de les persones pertenecientes a una minoría ye, supuestamente, ún de los valores fundamentales de la Xunión Europea, sinón de tol proyectu européu.
La Conferencia Internacional d’Espertos ‘Ewald Ammende’ organizada por la FUEN tien como oxetivu aldericar sobre la situación actual col fin de reflexonar y formular soluciones pa contrarrestar la grave regresión na protección de les minoríes llingüístiques col fin d’ ameyorar la protección de les mesmes. El foru d’espertos busca avanzar pa garantizar la so igualdá de drechos, mesmo qu’enfoques nuevos o más sólidos pa la protección de les minoríes.
