El vocal d’Iniciativa pol Asturianu, Inaciu Galán, participó esta selmana nel Europe’s National Minorities: Ways Forward for Minority Protection ‘Ewald Ammende’ International Expert Conference que se fixo en Bruseles entamáu por la Unión Federal de Nacionalidaees Europees (FUEN). Dientro del simposiu, Galán aprovechó pa presentar la situación de la llingua asturiana señalando ente otres cuestiones la falta de reconocimientu d’oficialidá pal idioma y la probe presencia del misma nos medios de comunicación públicos y el sistema educativu.
Galán, como ya fixo n’otros alcuentros con responsables d’entes europeos, señaló l’incumplimientu del artículu 11 de la Carta Europea de les Llingües que recueye’l compromisu de les alministraciones a “garantizar la creación de, al menos, una emisora de radio y una canal de televisión nes llingües rexonales o minoritaries”. Anguaño, la presencia del asturianu na Radiotelevisión del Principáu d’Asturies ye escasa ya inesistente nel casu del eonaviegu. Tampoco esiste presencia de nenguna de les dos llingües propies nel serviciu públicu de comunicación de titularidá estatal, RTVE.
El vocal de la organización de reivindicación llingüística treslladó tamién les dificultaes a les que s’enfrenta l’idioma nel sistema educativu, especialmente na etapa infantil, realidá que s’enfrenta colo que recueye la Carta Europea de les Llingües Minoritaries nel so artículu 8. La reglamentación llegal asturiana actual nun tien prevista la presencia del asturianu nesta etapa tan importante pa la tresmisión del idioma.
La Conferencia Internacional d’Espertos ‘Ewald Ammende’ organizada por la FUEN conoció estos díes la situación del asturianu, aldericando sobre los drechos llingüísticos de los y les falantes del idioma, llegando a la conclusión de que la declaración de la oficialidá nel Estatutu d’Autonomía del Principáu d’Asturies como una primera ferramienta pa tratar de solventar la perda de falantes, igualar los drechos llingüísticos de la ciudadanía y encarrilar el futuru del idioma.
