Avilés va convertise na capital de la reivindicación del asturianu cola llegada de la Xira pola Oficialidá. Esta va ser la sexta parada d’una campaña qu’entamen conxuntamente la Fundación Almastur y Iniciativa pol Asturianu pa concienciar a la sociedá civil asturiana sobre la importancia de protexer les llingües propies y movilizar a la mesma p’algamar la so oficialidá.
Les actividaes, que se van centralizar nel Palaciu de Valdecarzana, van entamar el llunes 2 de setiembre a les 19 hores cola inauguración d’una esposición bibliográfica y de ‘Voces: una historia de la llingua asturiana’. L’apertura de les xornaes va cuntar tamién cola collaboración de l’asociación cultural Xaréu d’Ochobre que va interpretar delles pieces musicales tradicionales. Darréu, va proyectase’l documental ‘De güeles a nietes. El retu de la tresmisión xeneracional del asturianu’ producíu por Iniciativa pol Asturianu y qu’afonda na importancia del caltenimientu interxeneracional del idioma.
El día siguiente va tener llugar una charra del profesor Xulio Viejo acerca del Fueru d’Avilés. Viejo va esponer la importancia llingüística d’esti documentu con una ponencia que lleva’l títulu ‘El Fueru d’Avilés y l’usu oficial del asturianu na Edá Media’.
La reivindicación de la oficialidá va tener un exe central nesta selmana. Por mor d’ello, el miércoles 4 de setiembre, va proyectase’l documental ‘La vida ensin oficialidá’. Esti trabayu audiovisual recueye diferentes testimonios de persones que padecieron problemes y discriminaciones por falar n’asturianu y que xustifica la demanda del reconimientu de los drechos llingüísticos. Esta xornada va zarrar cola intervención d’Inaciu Galán, miembru de l’Academia de la Llingua Asturiana, que va presentar la charra-coloquiu ‘¿Por qué sí a la oficialidá del asturianu?’.
El xueves 5 de setiembre, el profesor de la Universidá d’Uviéu Ramón d’Andrés, collaborador habitual de la Xira pola Oficialidá, va faer una presentación de la hestoria de la toponimia del conceyu baxo’l títulu ‘Toponimia d’Avilés. ¿Qué nos dicen los nomes de los nuestros pueblos?’.
La Xira pola Oficialidá va rematar la so presencia na Villa del Adelantáu el vienres 6 cola proyección del documental ‘Avilés tien poesía’ nel qu’apaecen diferentes escritores y poetes avilesinos. Pa finar, dellos escritores van participar nun recital poéticu como homenaxe a la llingua asturiana.
Toles actividaes van desencolcase nel espaciu cultural Palaciu de Valdecarzana de magar les 19 hores. Iniciativa pol Asturianu y la Fundación Almastur agradecen al Conceyu d’Avilés y a la Estaya de la Llingua d’Avilés la so collaboración pa sacar alantre esti programa.
