Ta acabante confirmase que la nueva llei que regulará la RTPA nun va incluyir nengún tipu d’avance pal usu de la llingua asturiana. El testu llexislativu va votase esti viniente día 17 na Xunta Xeneral. Iniciativa pol Asturianu denuncia qu’esta llei que va aprobase colos votos de FSA-PSOE y PP nun tien en cuenta les propuestes feches dende numberosos colectivos sociales, y al traviés d’enmiendes dende Foru Asturies ya Izquierda Xunida, pa que la presencia del asturianu tuviere una meyor situación. 

L'actual redacción del testu regulador de la RTPA diz al respective del asturianu: 

f) Promoción de la cultura y la educación, con especial protección del bable, mediante la promoción de su uso y difusión en los medios de comunicación social.

 

La redacción nueva diz: c) La promoción de la educación y la cultura, particularmente asturiana, con especial protección del bable/asturiano y del gallego/asturiano, mediante la promoción de su uso y difusión.

 

Esto amuesa un nulu avance, yá que nun se recueye ente los oxetivos nin un usu más ampliu del asturianu nin siquiera l’oxetivu normalizador de la radiotelevisión asturiana.

 

Amás, el Conseyu de Comunicación, qu’incorpora nuevos miembros nun acueye ente ellos a nenguna entidá venceyada cola llingua asturiana, como l’Academia de la Llingua Asturiana o les entidaes que trabayamos pola normalización del asturianu. 

 

Iniciativa pol Asturianu firmó xunto a otres munches entidaes, sindicatos y partíos, el documentu “Cinco puntos por unos medios públicos al serviciu d'Asturies”, presentáu na Academia de la Llingua Asturiana nel mes de febreru. Agora podemos dicir que na llei nueva nun apaez nengunu de los puntos recoyíos nesti manfiestu.

Pa Iniciativa pol Asturianu una radiotelevisión namás tien sentíu como una ferramienta útil pa la difusión de la llingua asturiana, vertebradora de la cultura asturiana y de la identidá de los asturianos.  Ye por ello que la nueva llei nun ta fecha dende’l sentíu común sinón dende los prexuicios cada vegada menos vivos na sociedá asturiana, yá que los resultaos de les audiencies demuestren un mui bon siguimientu per parte de los asturianos a los programes emitíos na nuesa llingua.