 13.50.38.png)
El pasáu 17 de xunetu llegó a la Xunta Xeneral una propuesta del Partíu Popular (PP) pa que la llingua asturiana tuviera como competencia directa en primaria, non solo a Cultura Asturiana, lo que yá supón un retrocesu, sinón tamién a otres llingües, nesti casu estranxeres, y una asignatura de tecnoloxíes de la información. Una propuesta que si llegara a aprobase supondría un futuru mui negru pal asturianu.
Dende Iniciativa pol Asturianu defendimos que nun yera posible poner a les families na situación de tener qu'escoyer ente estudiar la so propia llingua y una estranxera, yá que son dos drechos que tienen que se garantizar y ser compatibles.
La propuesta del PP foi refugada por tolos partíos del arcu parllamentariu, a esceición del diputáu d'UPyD, qu'incluyó una enmieda a esta propuesta pa que la cultura asturiana tuviera presente de forma treversal en tol currículu.
A la fin, namás 11 votos a favor los 10 del PP y el d’UPyD, frente a 33 en contra de partíos tan diferentes como FSA-PSOE, Foru Asturies ya Izquierda Xunida. Trés cuartes partes de la Xunta Xeneral dixeron un NON claru y rotundu, con unes defenses del asturianu clares y bien construyíes, polo que felicitamos a estes fuercies polítiques pola so respuesta clara.
Inaciu Galán, presidente d'Iniciativa pol Asturianu, tuvo presente a lo llargo del alderique que se celebró nel plenu de la Xunta Xeneral y pudo falar pocos minutos enantes de la votación con Mercedes Fernández, cabezalera del PP d'Asturies, esplicándo-y la postura de la organización y solicitándo-y que retirara la propuesta. Amás, pudo falar tamién colos diputaos de Foru Asturies ya Izquierda Xunida que defendieron la oposición a esta propuesta, felicitándolos poles sos respeutives defenses de la llingua asturiana na educación.
