La llingua asturiana vive una situación de minorización y desprestixu que nun se corrixó entá. Esto fai que munchos falantes, más o menos inconscientes, abandonen l’usu del idioma frente a persones desconocíes, o simplemente fuera del ámbitu familiar o coloquial. Esta ye una situación que ye vezu nes llingües minorizaes y que tien de correxise, con midíes que normalicen la presencia del idioma en cualesquier ámbitu.
Sicasí, esti compartamientu reproduzse tamién n’Asturies ente falantes con conciencia llingüística ya inclusive ente persones y representantes públicos que son reconocíos pola so reivindicación del asturianu. Ye’l momentu de trabayar nel refuerzu de la llealtá llingüística de los falantes d’asturianu, y mui n’especial, d’aquellos que cunten colos altavoces que lleguen a la sociedá y el prestixu de formar parte de les instituciones.
Los cargos públicos comprometíos col idioma, la xente de la cultura, toles persones, pero n’especial, aquelles que son modelu social pola so presencia habitual nos medios, han usar l’asturianu en toles ocasiones, demostrar la normalidá del so usu en tolos ámbitos, falando con otres persones que falen n’asturianu, o en castellán, porque les conversaciones billingües son una realidá n’Asturies, y la intercomprensión de les dos llingües nun xenera problema nengún pa que se produzan.
La llingua asturiana precisa de midíes de normalización pero la midida más eficaz pa da-y futuru, la más cenciella y la que ta en manes de tolos asturianos y asturianes, ye usar l’idioma en tolos ámbitos, ensin mieu a faelo meyor o peor, porque naide pue quitanos el drechu a espresanos na nuesa llingua y la nuesa llealtá llingüística ye’l meyor regalu que-y podemos faer al idioma.
