XIXÓN, 29/10/2019. Iván Llera, presidente d’Iniciativa pol Asturianu, fizo unes declaraciones nel aniversariu de la organización nes que dixo que “Iniciativa pol Asturianu celebra güei ocho años de trabayu, d’ilusión y d’esfuerciu col ánimu de siguir xuniendo voluntaes de tola sociedá pa salvar la llingua asturiana”. El presidente recordó que “ye un día nel que podemos soplar les veles gracies al enfotu, al esfuerciu y a la esperanza de tantes socies y socios que cola so collaboración y entrega tan llogrando salvar esti idioma y faciéndolo, amás, con una sonrisa”.

Nesi sentíu, el presidente recordó que “n’Iniciativa nun hai llugar pal desánimu, dende’l nuesu nacimientu intentamos siempres trabayar en pro d’un consensu de la ciudadanía en defensa de la oficialidá del idioma, sumando ya integrando a persones de toles sensibilidaes por un bien cultural común como ye l’asturianu. Naide entendería que la defensa de los horros o del arte asturianu tuviera dalguna vinculación ideolóxica. La llingua asturiana ye un elementu de la cultura asturiana y asina tenemos que defendelu”.

Iván Llera apuntó tamién que “va ocho años entamamos una carrera de fondu y a llargu plazu, consiguiendo cada día a día, minutu a minutu, que munches puedan sentise indentificaes col nuesu llabor. Ocho años dempués somos una entidá consolidada nel movimientu de reivindicación llingüística, organizando una montonera d’actos, con presencia pública continua, trabayando de siguío y con una bayura de collaboradores y d’asociaos y d’asociaes que formen el capital más importante d’esta organización”.

Nesti día tamién intervino Inaciu Galán, un de los fundadores y vocal de Rellaciones Institucionales ya Internacionales d’Iniciativa, qu’apuntó que “tamos nun día de celebración dempués d’ocho años d’actividá d’Iniciativa pol Asturianu de los que podemos tar arguyosos y arguyoses, tanto dende la entidá como dende la propia sociedá, por tolos cambios que se fixeron nestos años y a los que punximos el nuesu llabor al serviciu de consiguir un mayor consensu na sociedá”.

Galán recordó que “güei, ocho años más tarde, tenemos nel Parlamentu unes mayoríes mui significatives que nun esistíen entós a favor de la oficialidá y a favor del futuru del asturianu. Consiguimos implicar a muncha xente y a munchos colectivos pa consiguir una organización fuerte que precisamente ye útil pa la sociedá nesi cambiu de mentalidá pa entender a la llingua asturiana como un elementu clave pal futuru d’Asturies”.

“Tenemos que curiar, protexer y da-y futuru al idioma. Iniciativa pol Asturianu aportó un bon llabor que vamos siguir faciendo nos prósimos años cola continuidá del nuevu presidente Iván Llera y de la xente que cada vegada se van implicando más na organización” comentó’l vocal.

P’acabar, Iván Llera recordó que “n’Iniciativa nun hai llugar pal desánimu, tamos nun momentu bonu pal idioma con una mayoría parllamentaria a favor del asturianu. En tou casu, dende Iniciativa pol Asturianu vamos siguir trabayando pa llograr qu’esa mayoría seya unánime na sociedá”.

Siente equí les declaraciones d’Inaciu Galán, un de los fundadores y vocal de Rellaciones Institucionales ya Internacionales d’Iniciativa pol Asturianu.