“Dende Iniciativa pol Asturianu consideramos que ye positivo permitir l’usu llibre del asturianu por parte de los y les comparecientes qu’asina quieran facelo”

“Insistimos que la llingua asturiana nun puede depender de ‘bloques’ o d’ideoloxíes polítiques; tien que ser un elementu que sirva pa xunir. Invitamos a los partíos que votaron en contra a sumase a la mayoría social del consensu a favor de la oficialidá del asturianu”

XIXÓN, 25/10/2019. Iván Llera, presidente d’Iniciativa pol Asturianu, fizo unes declaraciones sobre la votación d’esti miércoles pa tramitar una reforma del reglamentu de  la cámara pa permitir l’usu de la llingua asturiana. Llera apuntó que “pa Iniciativa pol Asturianu el resultáu de la votación d’esta selmana na Xunta Xeneral aporta llibertá y normalidá a la máxima institución democrática d’Asturies”.

El presidente de la organización comentó que “a pesar de la victoria parlamentaria, insistimos que la llingua asturiana nun puede depender de ‘bloques’ o d’ideoloxíes polítiques; tien que ser un elementu que sirva pa xunir. Invitamos a los partíos que votaron en contra a sumase a la mayoría social del consensu a favor de la oficialidá del asturianu. Nesti sentíu, invitamos a los partíos a defender la oficialidá como ferramienta pa salvar y l’idioma y cumplir el mandatu constitucional del artículu 3.2”.

Llera añadió que “dende Iniciativa pol Asturianu consideramos que ye positivo permitir l’usu llibre del asturianu por parte de los y les comparecientes qu’asina quieran facelo. Esta midía nun implica obligatoriedá d’usu a nengún cargu públicu, nin de nengún diputáu o diputada de nengún grupu parlamentariu. Únicamente permite que los representantes que quieran falar asturianu, de manera llibre, puedan facelo”.

P’acabar, Iván Llera dixo que “21 años dempués de l’aprobación de la Llei d’Usu por un Gobiernu del PP, va iguase una anomalía na que los cargos públicos nun podíen facer usu del asturianu na cimera institución democrática d’Asturies”.