Les organizaciones reclamen al Gobiernu d’Asturies instar a la Fiscalía pa ver si hai un posible delitu d’odiu na campaña firmada por Vox

Pa les entidaes la meyor manera de frenar estes campañes ye llexislando p’algamar y afitar drechos civiles

Dempués d’una nueva campaña de Vox escontra la oficialidá de la llingua asturiana al traviés d’un cartel con un diseñu homófobu, les organizaciones Iniciativa pol Asturianu y Xente LGTB Astur (XEGA) sumáronse pa denunciar esta llamentable campaña escontra los drechos civiles.

Per un llau, Iniciativa pol Asturianu denunció que “tamos ante una nueva campaña escontra la llibertá, la mayoría social y l’idioma. Xustamente lo contrario de lo que reclama la sociedá asturiana que ye respetu, convivencia y futuru pa les llingües d’Asturies. Treslladamos la nuesa condena y l’ánimu a Adrián Barbón, presidente del Gobiernu d’Asturies, y a Adrián Pumares, secretario general de Foro. Pero nun ye’l momentu de quedar paraos. Ye’l momentu de poner puxu na reforma estatutaria”.

Pela so parte, XEGA denunció’l claru matiz homófobu de la campaña entamada pola estrema drecha. “La realidá d’esta minoría ye la de siempres: oponése a cualesquier avance de drechos seyan sociales, civiles o llingüísticos y amás faciéndolo d’una manera que ye la d’atacar la sensibilidá d’un colectivu tan maltráu. La homofobia nun tien cabida na política asturiana. Agora toca actuar y aprobar una llei LGTB n’Asturies”.

Les organizaciones Iniciativa pol Asturianu y XEGA ficieron un llamáu al Gobiernu d’Asturies pa instar a la Fiscalía pa ver si hai un posible delitu d’odiu na campaña firmada por Vox. “Les persones que trabayamos pa consiguir drechos pa toos y toes queremos una condena a esta campaña tan llamentable y cutre”.

Pa les entidaes la meyor manera de frenar estes campañes ye llexislando p’algamar y afitar drechos civiles al traviés de la reforma estatutaria pa incluyir la oficialidá y al traviés de l’aprobación d’una llei LGTB n’Asturies.