L'Alcuentru celebraráse los díes 23 y 24 de xunu, nos que se van axuntar axentes que trabayen na revitalización de llingües de toa Europa. Va ser n'Orona Ideo (Fundación Orona), y mientres dos díes activaránse rellación, collaboraciones y sinerxes ente los participantes per aciu numberoses presentaciones y actividaes.
L'Alcuentru va ser una posa nel percorríu del proyectu "Hitzargiak – Llingües que s'allumen unes a otres", pa que les comunidaes llingüístiques y falantes que tán somorguiaes nun procesu de revitalización puedan conocese ente sigo y fortalezan los sos llazos, coles mires de consiguir una mayor eficacia nel futuru.
Hasta'l momentu, la iniciativa arrexuntó más de 70 bones práctiques, d'un total de 12 países y 24 llingües, ente les que tán los proyectos audiovisuales d'Iniciativa pol Asturianu, asina como, tamién dende Asturies, el proyectu "La escolina" de formación n'asturianu pa neños de Reciella. Families pol asturianu.
Va Ser una oportunidá inmeyorable p'aprender d'otres comunidaes llingüístiques, según pa compartir la conocencia y esperiencies propios con miembros de distintes comunidaes. Ello ye que l'impulsar relaciones y entevistes ente distintos ye unu de los principales oxetivos del Alcuentru.
El proyectu "Hitzargiak – Llingües que s'allumen unes a otres" ye un proyectu que favorez la diversidá llingüística europea, yá que va crear nueves rellaciones ente les comunidaes d'idiomes y de falantes que tán yá somorguiaes en procesos de revitalización, y va fortalecer les yá esistentes. Cuantes más comunidaes llingüístiques s'activen nesti procesu, más posibilidaes va haber d'algamar l'ésitu.
La exa del proyectu fórmenla los procedimientos de too tipu qu'utilizaron les comunidaes de falantes. Estos procedimientos son innovadores, afayadizos, esitosos o exemplares, mesmo pa la comunidá que los creó como que pa munches otres comunidaes llingüístiques o de falantes.
La conocencia de les bones práctiques puede tener efectos multiplicadores; compartir esperiencies, deprender de los demás, alimentase unos a otros y collaborar nes iniciatives puede reforzar l'ésitu y, amás d'aunir l'enfoque global y el llocal, fortalecer el movimientu internacional.
Poro, la meta del proyectu Hitzargiak ye arrexuntar bones práctiques y amosales na web, amás de poner en contactu a organismos que tán trabayando na revitalización d'idiomes. Esos son el so puntu de mira y el so oxetivu. Les bones práctiques reflexáronse nun mapa como una lluz asitiada nel ámbitu d'influencia del idioma correspondiente. Según se vaigan arrexuntando actividaes de revitalización d'idiomes dirán amosándose estos idiomes nel mapa, de forma que podrá vese la estensión del idioma pal que s'empecipió cada actividá.
Ta abierta la matrícula pa participar nesti eventu, con descuentu si se fai enantes del 17 de xunu, equí.
