“La única manera de salvar la reforma estatutaria y la oficialidá ye facer hábil el primer mes del añu 2022”
“Volvemos a ufiertanos, como organización, pa contribuyir a tender pontes ente los partíos”
Iniciativa pol Asturianu sofita la propuesta d’Izquierda Xunida p’habilitar el mes de xineru na Xunta Xeneral. La organización súmase a la propuesta del grupu parllamentariu d’Izquierda Xunida pa que siga l’actividá parllamentaria nel mes de xineru del prósimu 2022 y poder avanzar nel trabayu previu a la reforma estatutaria y la declaración de la oficialidá de les llingües d’Asturies.
Nesi sen, dende Iniciativa pol Asturianu recalcóse que “la única manera de salvar la reforma estatutaria y la oficialidá ye facer hábil el primer mes del añu 2022 nel parllamentu. Los partíos tienen que ser conscientes de los plazos colos que cuntamos y que ye imprescindible poner enfotu nesi trabayu”.
“Tamos acabantes de presentar un manifiestu robláu por más de 300 profesores d’universidaes de tol planeta que vamos facer llegar a los grupos parllamentarios de la Xunta Xeneral del Principáu d’Asturies. Queremos que los partíos valoren esti manifiestu y que pongan una verdadera voluntá en desatascar la reforma estatutaria” apuntóse dende la organización. Iniciativa pol Asturianu vuelve a facer un ufrimientu a los partíos pa contribuyir a tender pontes y mediar nesti debate y llograr sumar, acercar posiciones y algamar un consensu”. La organización anunció que “insistimos a ufiertanos, como organización, pa facer xuntura de posiciones ente los diferentes partíos. Si s’habilita’l mes de xineru, vamos proponer facer na primera selmana d’esi mes una mesa de diálogu ente PSOE, Podemos, Izquierda Xunida y Foro pa llograr un alcuerdu”.
