Iniciativa pol Asturianu llamenta que l’asturianu nun tuviera presente esti añu nel discursu del xefe del Estáu, el Rei Felipe VI. Tamos nun momentu favorable pal idioma, con una mayoría parlamentaria que sofita esi consensu constitucional pol idioma y por ello, la llingua asturiana tenía qu’apaecer nesti discursu.
Dende la organización recuérdase que “el fechu anómalu de que la llingua asturiana nun seya entá oficial nun quita pa que la Casa Real use l’asturianu, yá que la normativa actual obliga a les instituciones a protexer y fomentar el so usu”, acordies colo qu’establez l’Estatutu d’Autonomía y la Llei d’Usu del Asturianu, amás de la Constitución y la Carta Europea de les Llingües Minoritaries, roblada por España.
Iniciativa pol Asturianu solicita al xefe del Estáu qu’amuese respetu por toles llingües del estáu, independientemente del so estatus llegal, yá que los y las asturianas tenemos el mesmu drechu a que la nuesa llingua apaeza xunto a les demás nes pallabres del cabezaleru del Estáu al que pertenecemos.
Nesi sen, la organización apunta que “si a lo llargo d’esti añu se llogra la oficialidá dientro de la reforma estatutaria, Iniciativa pol Asturianu va contactar cola Casa Real pa reclamar la presencia del idioma nel discursu xunto col resto de llingües oficiales del Estáu”.
