Iniciativa pol Asturianu recibió l’avisu de varies personaes asociaes pol descontentu ante una desafortunada opinión manifestada por una representante del sindicatu ANPE (Asociación Nacional de Profesionales de la Enseñanza) dientro de les visites que’l sindicatu ta faciendo a diferentes centros educativos. Nun alcuentru con docentes esta semana, una persona entrugó pola posición del sindicatu acerca de la situación del profesoráu d’asturianu. La rempuesta foi totalmente ablucante pa la docente y pa la propia organización de reivindicación llingüística. La representante del sindicatu retrucó que “el profesorado de asturiano está puesto prácticamente a dedo y no pueden reclamar nada”.
Nesi sen, hai que recordar qu’anguaño la gran mayoría de los docentes de Llingua Asturiana y d’Eonaviego alcuéntrense nuna nidia situación de precariedá llaboral, con una falta d’estabilidá nel so trabayu qu’afeuta direutamente na so aición docente. La interinidá d’estos profesionales y en munchos casos la itinerancia ente los centros escolares dificulta la creación por parte de los educadores de proyeutos y planes de promoción llingüística al nun alcontrar un futuru fiable de permanencia nos colexos y centros educativos.
A esta falta de reconocencia y valoración de los profesionales docentes, súmase la insuficiencia del horariu establecíu pa l’asignatura y la falta de materiales a disposición del alumnáu y del profesoráu. D’esti mou, la materia atópase en clara desventaya con respeuto a les demás y al terminar la etapa d’Educación Primaria munches de les escolines y escolinos opten por matriculase n’otres asignatures y nun siguir cursando la llingua propia. Ésta ye la llamentable y triste realidá de los y les docentes de les materies d’Asturianu y Eonaviego.
Iniciativa pol Asturianu desconoz si esta valoración manifestada pola representante del sindicatu ANPE sobre’l profesoráu d’asturianu y la so situación llaboral ye una opinión personal o por contra ye’l sentir de la organización sindical y por ello mandó una carta al presidente d’ANPE Asturies mostrando’l descontentu y ufriéndose p’aclarar cuál ye la realidá llaboral del profesoráu de Llingua Asturiana y de la propia asignatura.
