XIXÓN, 27/04/2021. Iniciativa pol Asturianu treslladó esti llunes, nel Conseyu Asesor de Política Llingüística de la Conseyería de Cultura, Política Llingüística y Turismu, la necesidá d’abrir «cuanto enantes posible» la reforma del Estatutu d’Autonomía pa reconocer del asturianu y del gallego-asturianu como llingües oficiales. La organización, al traviés del so presidente, Iván Llera, llamentó la falta d’información al respectu de los planes del Gobiernu d’Asturies pa sacar alantres esta iniciativa: «Nin nós nin los representantes políticos colos que tenemos contactu tenemos nengún tipu d’información».
Iniciativa pol Asturianu entiende que ye necesario sumar al másimu númberu de formaciones polítiques al consesu pola oficialidá. El representante de la organización recordó que tamos a la metá de la llexisllatura y que’l procesu de reforma del Estatutu ye un procesu llargu: «Nun hai que perder más tiempu. La modificación de la norma cimera de la Comunidá Autónoma supón tamién la so aprobación nel Congresu de los Diputaos, nun procesu que pue allargase años». Nesti sen, Llera encamentó al Gobiernu asturianu a sentase a falar coles demás formaciones enantes del branu y llegar a setiembre con una propuesta enriba de la mesa pa que «esa reforma pola que tanto naguamos salga alantre col másimu númberu posible de votos a favor y los menos a la escontra».
