XIXÓN, 07/05/2021. Iniciativa pol Asturianu reivindicó esti vienres la necesidá urxente d’entamar la reforma del Estatutu d’Autonomía d’Asturies pa incluyir la oficialidá del asturianu. La entidá pidió al Gobiernu asturianu y a los grupos parllamentarios que se pongan a trabayar de manera urxente na reforma estatuaria pa consiguir la oficialidá de les diferentes llingües que se falen n’Asturies. Nesi sen, la organización reclamó seriedá y voluntá de trabayu pa iguar de manera definitiva la desigualdá de drechos llingüísticos ente la ciudadanía asturiana. “Llevamos más d’un mes nuna polémica absurda y estéril como ye l’usu del idioma na Xunta Xeneral. Hai una mayoría favoratible al idioma y a la oficialidá. Ye’l momentu pa ponese a trabayar nuna reforma estatutaria” apuntóse dende Iniciativa pol Asturianu. “Tenemos los votos, tanto en Madrid como n’Asturies, pa llograr iguar de manera definitiva esta anomalía constitucional y dar normalidá a la llingua asturiana”.
Campaña Día de les Lletres
Güei vienres celébrase’l XLII Día de les Lletres Asturianes, ya Iniciativa pol Asturianu quier festexalo de la meyor forma: falando. D’esta manera, y cola collaboración de diferentes persones interesaes na llingua asturiana, la organización fizo un vídeu utilizando les pallabres que mos acompañen nel día a día. Pallabres n’asturianu que s’utilizan con normalidá y que tan presentes nel vocabulariu de la xente dende la infancia.
Grabáu en diferentes llugares, evocando los diferentes llugares d’Asturies, les persones implicaes escoyeron la so pallabra favorita n’asturianu (muyer, llibertá, orbayu, perru, diversidá…), amás d’espresiones qu’usamos a diario, cola intención de faceles notar.
La principal finalidá del vídeu ye facer llegar a la sociedá la riqueza y el valir del idioma, los sos beneficios, amás de manifestar lo cercano que ye a nós. Dientro del vídeu faese un llamáu a caltener vivu esti vocabulariu, y la única manera ye consiguiendo la reconocencia oficial pal idioma.
Mostrando nel vídeu la diversidá de pallabres, ya de persones que les dicen, Iniciativa pol Asturianu reivindica la realidá llingüística d’Asturies y que la sociedá tien-y estima a la so llingua materna.
