Iniciativa pol Asturianu, al traviés de la so Vocalía d'Enseñu, vuelve a sofitar una convocatoria del colectivu de docentes de llingua asturiana. Nesta ocasión, la organización fai un llamáu a participar na concentración na plaza La Escandalera d'Uviéu, esti xueves 7 de marzu a les siete la tarde.
La organización participa activamente de les movilzaciones y presentó'l pasáu 11 de febreru nel llar del Ministeriu d’Educación, en Madrid, una carta dirixida al Ministru, cola fin d’amosar el refugu de la organización a la situación na quedaría la llingua asturiana d’aprobase la nueva reforma educativa, amás de pidir que se reconoza yá la especialidá d'asturianu, pa que la situación del profesoráu nun seya de marxinación como agora.
La postura marcada por Iniciativa pol Asturianu ye la de buscar una solución inmediata pa los problemes más urxentes, los dos yá citaos. Al mesmu tiempu, hai dos idees clares sobre cómo ha ser el futuru de la llingua asturiana nes escueles: En primer llugar, l’asturianu ha ser una asignatura pa tolos alumnos, una asignatura normal, non una “optativa” nin “voluntaria”, non enfrentada a otres materies. Y en segundu llugar, dar pasos pa que l’asturianu se convierta na llingua vehicular d’otres asignatures, buscando un modelu afayadizu p’Asturies que permita que l’asturianu seya llingua d’usu habitual nes aules
Editorial: Bable nes escueles
