Iniciativa pol Asturianu y la compañía telefónica Nordés tan acabantes de roblar un alcuerdu de collaboración. D’esta manera, los y les socies de la organización de reivindicación llingüística van poder acceder a un descuentu del 5% na tarifa mensual. Esti descuentu va ser aplicable a les tarifes Plus (Galana+, Asturcón+ y Urriellu+) qu’ufierta Nordés. Van poder acoyese a esta promoción toles nueves altes de Nordés y qu’al mesmu tiempu formen parte d’Iniciativa pol Asturianu.

Nordés Móvil ye la primer compañía telefónica que fai usu normal del asturianu nes campañes publicitaries y colos clientes. L’operador virtual, que tien cobertura estatal, ofrez a los clientes la posibilidá de ser atendíu n’asturianu, asina como la opción de recibir la factura na nuesa llingua. Con esti conveniu, toles persones socies d’Iniciativa pol Asturianu van poder acceder con ventayes al serviciu de Nordés Móvil. La organización quier agradez l’apueste d’esta nueva iniciativa empresarial y aplaude’l so compromisu pa cola llingua asturiana.