Iniciativa pol Asturianu presenta la nueva campaña ‘Garanticemos la pluralidá llingüística’. Col videu, fechu en comuña xunto con otres entidaes del Estáu, preténdese reivindicar la diversidá llingüística. Un 45% de la población española vive en territorios con llingua propia que tien que convivir col castellán.
La infografía amuesa que les llingües son diversidá, que’l so usu nun va contra naide y que nun hai llingües superiores nin inferiores. Amás, pretende facer ver la situación de desigualdá del asturianu y les demás llingües frente al castellán. Esti fechu afecta especialmente a la llingua asturiana. Asina, la falta d’oficialidá agranda esa diferencia de drechos de la ciudadanía asturfalante. La voluntá d’estes asociaciones ye que’l Gobiernu central cumpla los alcuerdos internacionales que ratificó y les recomendaciones del Conseyu d’Europa nesta materia.
La participación d’Iniciativa pol Asturianu y la presencia del nuesu idioma nesta campaña ye una continuación del trabayu desendolcáu cola presentación va un añu del manifiestu Pluralidá Llingüística: Llibertá, Igualdá y Democracia. Iniciativa pol Asturianu quier mostrar al restu de comunidaes llingüístiques y al restu del Estáu la complicada situación del idioma.
