La organización reitera a la Conseyería d’Educación que garantice’l suficiente profesoráu d’asturianu, asina como los medios pa desarrollar el llabor docente
Iniciativa pol Asturianu recuerda que, anque nun centru esista una sola matrícula na asignatura, l’alumnáu tien drechu a la formación llibre n’asturianu
XIXÓN, 03/09/2020. Iniciativa pol Asturianu recuerda a les families que tovía ye posible matriculase na asignatura de Llingua Asturiana nos diferentes centros educativos. La entidá apunta qu’agora que yá tán abiertos los centros educativos les families tienen que tar sollertes a les matrícules nos centros pa poder inscribise na asignatura.
Amás, la organización reclama a la Conseyería d’Educación que garantice’l suficiente profesoráu d’asturianu o de gallego-asturianu, asina como los medios pa desarrollar el llabor docente nesti añu tan complicáu. Añu tres añu alcontrámonos con una montonera de families que tienen dificultaes p’apuntar a la reciella na asignatura d’asturianu, con unes inscripciones y formularios nos que munchos casos nun apaez la opción d’asturianu y dempués munchos alumnos y alumnes que queden ensin profesor. Iniciativa pol Asturianu fai un llamáu pa iguar d’una manera definitiva esta situación.
Nesi sentíu, la organización recuerda que, anque nun centru esista una sola matrícula na asignatura, l’alumnáu tien drechu a la formación llibre n’asturianu o gallego-asturianu. Esti yera’l compromisu de la Conseyería va otros cursos académicos y polo tanto hai que conseguir afitar esti compromisu pa da-y estabilidá y continuidá a l’asignatura nos centros y siguir medrando’l númberu de matrícules.
