Cola información recoyida nesti conceyu telemáticu la organización quier treslladar a la Conseyería toles necesidaes del profesoráu d’asturianu pa esti cursu
Toles cuestiones que se van tratar son propies d’esta estaya de los y les mayestres y profesores d’asturianu que tienen unes dificultaes específiques propies de la precariedá de la especialidá
La organización fai tamién un brinde a los responsables sindicales pa participar nel alcuentru yá que nun ye l’enfotu d’Iniciativa pol Asturianu sustituyir el so llabor, sinón complementalu y apoyalu nesta materia
XIXÓN, 11/09/2020. Iniciativa pol Asturianu convoca un alcuentru con profesionales de la enseñanza d’asturianu pa recoyer toles problemátiques que se tán alcontrando nesti cursu académicu. La entidá yá detectó delles quexes de profesores relatives a la non concesión d’espacios pal exerciciu de la docencia, organización deficiente de los horarios o, inclusive, la xuntura de les asignatures de Cultura y Asturianu na etapa d’Educación Primaria.
Toles cuestiones que se van tratar nesta convocatoria, entamada dende Iniciativa pol Asturianu, son propies d’esta estaya de los y les mayestres y profesores d’asturianu que tán teniendo munches dificultaes nesti entamu de cursu y que ye importante iguar lo primero posible.
La organización fai tamién un brinde a los y les responsables sindicales pa participar nel alcuentru. Ye importante sumar esfuercios y llograr treslladar unánimemente les necesidaes de los educadores.