La organización remarca la incomprensión de poner torgues a cualquier desarrollu de la Llei d’Usu
“La Constitución nel so artículu 3.2 ye mui clara, l’artículu 4 del Estatutu fala de la protección del asturianu y esta ordenanza enmárcase dientro de la Llei d’Usu”
“Esta ordenanza nun costaba un céntimu al contribuyente nin xeneraba nengún tipu d’obligación”
XIXÓN, 26/05/2021. El Tribunal Superior de Xusticia d’Asturies ta acabante de dictar sentencia sobre les ordenances d’usu del asturianu del Conceyu de Noreña. Dempués de conocer esta noticia, Inaciu Iglesias, directivu d’Iniciativa pol Asturianu, aprovechó pa remarcar la so incomprensión de poner torgues a cualquier desarrollu de la Llei d’Usu nesti conceyu. “Resulta incomprensible poner el llímite llegal pal idioma na Llei d’Usu ya intentar bloquear cualesquier avance na normalización social del asturianu nos conceyos” apuntó’l representante de la organización.
Iglesias, promotor d’esta ordenanza, aprovechó pa recordar que “tamos ante una situación d’anormalidá llexislativa. Por un lláu, la Constitución nel so artículu 3.2 ye mui clara, l’artículu 4 del Estatutu fala de la protección del asturianu y esta ordenanza ta bloqueada cuando s’ampara na propia Llei d’Usu. Esta actitud, ante una ordenanza que únicamente garantiza drechos y nun obliga a nada, refuerza la necesidá de la reforma estatutaria pa incluyir la oficialidá del idioma”.
Pa terminar, Inaciu Iglesias aclaró que “dende Iniciativa pol Asturianu recordamos qu’esta ordenanza nun costaba un céntimu al contribuyente nin xeneraba nengún tipu d’obligación nin pal funcionariáu nin pa la ciudadanía”.
