La organización de reivindicación llingüística Iniciativa pol Asturianu reclama al Partíu Popular d’Asturies que na celebración del so congresu, esta fin de selmana, dean un pasu alantre y apoyen la oficialidá de les llingües d’Asturies, «la postura más coherente cola Constitución española y cola posición del partíu n’otros territorios, como Galicia, onde sofiten la oficialidá y la normalización del gallegu».
El nuevu presidente del PP d’Asturies, Álvaro Queipo, mostró en delles ocasiones una sensibilidá pa coles llingües d’Asturies, llegando a usar l’eonaviegu nel parllamentu asturianu y en materiales de la campaña electoral autonómica. «Ye’l momentu de convertir esos pasos en posicionamientos favoratibles al cumplimientu de la Constitución en materia llingüística n’Asturies» argumenten dende l’asociación de reivindicación llingüística.
Sumase al consensu constitucional poles llingües tien que ser un pasu natural pal Partíu Popular d’Asturies, mesmo en coherencia con otros territorios d’España, que col sofitu ciudadanu que ye cada vegada más claru n’Asturies.
