Iniciativa pol Asturianu llamenta la desapaición de la llingua asturiana de la páxina web del Conceyu de Siero. L’equipu de gobiernu presentó esti martes el nuevu portal municipal, que nun tien presencia dala de la llingua asturiana. La organización de reivindicación llingüística valora’l procuru pa, salvo escepciones, recoyer la toponimia oficial, pero considera que’l desaniciu de la llingua propia de la páxina web ye una oportunidá perdida pa siguir normalizando l’idioma. L’usu de la llingua asturiana nun supondría un costu superior, ya que la web cuenta con versiones en francés, inglés, alemán y italianu amás d’en castellán.
Iniciativa pol Asturianu llamenta la supresión del idioma, una decisión que choca frontalmente col propiu programa electoral de la FSA-PSOE y tamién confronta cola Llei 1/98, de 23 de marzu, d’Usu y Promoción del Bable/Asturianu que, nel so artículu 8, recueye que “los ayuntamientos asturianos podrán adoptar les midíes necesaries p’asegurar la efectividá del exerciciu de los derechos llingüísticos qu’esta Llei concede a los ciudadanos residentes n’Asturies”. Pa l’asociación, resulta incomprensible qu’un partíu que nel so programa electoral recueye’l reconocimientu d’oficialidá pa les llingües d’Asturies tolere pasos atrás na presencia igualitaria y normal de la llingua asturiana.
Propuestes en materia llingüística
Ante esta decisión, la entidá reclama la recuperación del asturianu na páxina web. Iniciativa pol Asturianu va treslladar a los grupos municipales del Conceyu de Siero la importancia d’esta midida asina como una propuesta pa sacar alantre nel plenu unes ordenances que recueyan el drechu al usu y regule’l mesmu na alministración municipal de Siero. Amás, la organización va solicitar tamién, al Gobiernu y a la oposición, la recuperación del Serviciu de Normalización Llingüística suprimíu pol gobiernu socialista d’Ángel García.
Iniciativa pol Asturianu ye una asociación ensin porgüeyu económicu que nun recibe ayudes nin sovenciones públiques. Llevamos más d’una década trabayando pola normalización social de les nueses llingües y pol reconocimientu de los drechos llingüísticos de los sos falantes. Trabayamos p’algamar espacios de normalidá pa la llingua asturiana, al traviés d’acciones concretes que mos permitan llegar a alcuerdos con entidaes de toa triba que supongan afitar l’usu del asturianu n’ámbitos nuevos. D’igual manera, buscamos consensos y alcuerdos sobre l’usu del asturianu, faciendo usu de campañes reivindicatives nes situaciones nes que ye necesario.
