Ante’l bloquéu de les negociaciones pa la reforma del Estatutu d’Autonomía, Iniciativa pol Asturianu fai un llamáu al entedimientu ente toles fuercies polítiques que tán participando nes conversaciones y, de manera especial, a Foro Asturias. La organización reclama al diputáu d’esa formación, Adrián Pumares, valentía pa sacar alantre la reforma. «Nun podemos dexar pasar esta oportunidá d’aprobar la oficialidá dientro de la reforma estatutaria pa que llegue al Congresu de los Diputaos nesta llexislatura, dempués de 40 años de falta d’oficialidá».
“Reclamamos a Pumares valentía y xenerosidá pa ser partícipe y figura fundamental pa la hestoria nesta reforma del Estutu d’Autonomía d’Asturies. Pero tamién esiximos respetu a la ciudadanía nesti alderique nel que se tendríen de tar negociando cuestiones propies de la reforma estatutaria, non de política fiscal, que forma parte d’otru ámbitu bien distintu a esti. Nun hubo precedente d’una negociación como esta nel restu de comunidaes autónomes con llingua propia”, apúntase dende la organización.
Iniciativa pol Asturianu considera que “Foro tien una oportunidá d’ufiertáse como un partíu asturianu y de llograr revertir una anomalía constitucional como ye la falta de drechos llingüísticos de los y les falantes d’asturianu y gallegu-asturianu o pela cueta, quedar como una formación que nun consigue llogros p’Asturies”. Nesi sen, la entidá, que vien trabayando de forma intensa nos caberos díes poniendo sobre la mesa de los partíos delles propuestes que podríen ser útiles habiendo voluntá, vuelve otra vegada a amosar la so disposición como representante civil pa siguir echando un gabitu nesti camín que pue permitir desbloquiar ente toos esta situación.
Iniciativa pol Asturianu enfótase tamién na conciencia del trabayu que tienen los partíos per delante y camienta que tovía ye posible un alcuerdu in extremis pa salvar la reforma estatutaria del bloquéu. «Si nun lo consiguen los partíos sedrá una derrota colectiva, magar que con mayor responsabilidá p’aquellos que ponen sobre la mesa bloquéu en llugar de propuestes que permitan llegar a un alcuerdu necesariu y demandáu pola sociedá».
