Iniciativa pol Asturianu va participar na manifestación pola oficialidá convocada pola Xunta pola Defensa de la Llingua Asturiana pal prósimu sábadu 7 de mayu n’Uviéu. D’esta manera, la organización quier sumase a esta convocatoria pa visibilizar al másimu la reclamación de la oficialidá de la llingua asturiana. La marcha va salir de magar les 12 hores de la Estación del Norte de la capital.
Animamos a tolos nuesos socios, simpatizantes y persones enfotaes nel futuru del idioma a participar con nós na manifestación. Ye’l momentu de llevantar la voz pola nuesa llingua nel meyor momentu históricu pal idioma. Ye’l momentu de facer visible na cai’l consensu a favor del idioma qu’hai na sociedá asturiana. Por too ello, facemos un llamáu a la participación na convocatoria del prósimu 7 de mayu.
Dempués del bloquéu de la reforma estatutaria ye’l momentu de caltener la movilización, siguir trabayando pol consensu y sumando voluntaes. Ye importante la movilización de la sociedá asturiana, que ye mayoritariamente favoratible a que l’idioma se convierta nuna llingua normal, que pueda usase en tolos ámbitos y que tenga garantizáu’l so futuru.
Si t’animes a echar un gabitu na manifestación, apúntate equí.
