Iniciativa pol Asturianu considera decepcionante y poco ambiciosa la presencia de la llingua asturiana y del gallego-asturiano nos nuevos currículos educativos presentaos pola Conseyería d’Educación nes selmanes caberes. La organización reclama al Executivu una presencia digna de les llingües propies en toles etapes educatives pa dar cumplimientu al mandatu de la Llei d’Usu. L’artículu diez d’esta norma establez que «el Principáu d’Asturies ha garantizar l’enseñu del bable/asturianu en tolos niveles y graos» y garantiza que los alumnos qu’escueyan el so aprendimientu tendrán de recibir «la mesma formación y conocimientos n’igualdá de condiciones que’l restu del alumnáu».
Los currículos educativos ellaboraos pola Conseyería d’Educación pa concretar l’aplicación de la LOMLOE na comunidá namás recueyen pequeños avances pa Llingua Asturiana nel casu de Bachilleratu, onde esta materia pasa d’una a tres hores selmanales. Sicasí, l’asignatura va siguir compitiendo con otres asignatures nesta etapa, como tamién pasa en Secundaria, contraviniendo l’espíritu de la citada llei. Nel restu d’etapes educatives la presencia de l’asignatura nun ameyora: pierde una hora nel cuartu cursu de Secundaria y caltién una insuficiente hora y media selmanal en Primaria. Nel casu de la educación Infantil nin siquiera se cita.
La entidá reclama que la presencia del asturianu dientro de la formación educativa tenga una mayor continuidá y refuga los saltos d’hores dependiendo del cursu y la etapa. «Esto llograría dar estabilidá a l’asignatura y permitiría tamién un refuerzu nos propios conocimientos del alumnáu”.
Campaña de matriculación
Iniciativa pol Asturianu aprovechó pa recordar la necesidá de sacar a tiempu la campaña de matriculación pal siguiente cursu en tiempu y forma. La organización recuerda que yá treslladó en delles ocasiones esta demanda a la Dirección Xeneral de Política Llingüística y a la propia Conseyera d’Educación, Lydia Espina, nel conceyu que caltuvo cola organización nel pasáu mes de febreru. “Nun ye de recibu publicar una campaña informativa con unes feches nes que yá tan cumplimentaes prácticamente toles matrícules”, apunten.
