La Rede Europea d'Igualdá de Llingües (ELEN) celebrará la so Xunta Xeneral en Bucarest, Rumanía, el sábadu 10 d'ochobre, organizada pol Conseyu d'Aromunes. Xosé B. Álvarez, responsable de Rellaciones Internacionales d'Iniciativa pol Asturianu tará representando a la organización y presentará los caberos problemes que vien careciendo la llingua asturiana y la so comunidá falante, asina como la repercusión de la nuesa presencia nes Naciones Xuníes.

Los delegaos que representen a los falantes de llíngües minoritaries d'Europa aconceyarán esta fin de selmana na capital rumana p'aldericar munchos de los temes vitales qu'afeuten a les sos llíngües y cómo ELEN trabayará xunto conles sos organizaciones miembro nos ámbitos llocal, nacional y internacional.

El Presidente del Conseyu d'Aromunes, Niciolas Caracota, dixo: "Unu de los oxetivos de la Xunta Xeneral d'ELEN sedrá sobre la situación de los Aromunes, que s'enfrenten a numberosos retos en dellos estaos de la XE, incluyendo la falta de reconocencia per parte de Rumanía y la falta xeneralizada de provisión d'escolarización media y de medios en fala aromuna. Organizaciones aromunes de Rumanía, Serbia, Macedonia, Bulgaria, Albania y Grecia contribuirán nel alderique".

"Delegados d'ELEN y convidaos de toa Europa viaxarán pa escuchar una amplia gama de presentaciones sobre llíngües europees minorizaes", dixo'l Secretariu Xeneral d'ELEN, Davyth Hicks. "Éstes inclúin el nuevu proyeutu de Protocolu del idioma p'afitar un nuevu estándar llegal pa los drechos llingüísticos dirixidos pelos nuesos miembros vascos Kontseilua, el recién informe d'ELEN nes Naciones Xuníes sobre discriminación llingüística nel Estáu español, les prósimes manifestaciones pola llexislación llingüística y la igualdá de estatus pal Bretón, l'occitanu, l'alsacianu, el corsu, el vascu y el catalán nel Estáu francés el 24 d'ochobre, les nueses actividaes col Conseyu d'Europa, el Parllamentu Européu y la Comisión, el drechu a la educación media en gaélicu, la promoción del irlandés y el galés, del húngaru en Rumanía y Eslovaquia y el nuevu Proyeutu de Diversidá Llingüística Dixital d'ELEN, financiáu pola XE, que tien l'oxetivu d'aumentar la cantidá de conteníu dixital online nes llingües minorizaes y en peligru de desaniciu. "

La Xunta Xeneral cellebraráse nel Hotel Royal Bucharest.

ELEN ye una ONG a nivel internacional que trabaya pola promoción, proteición y revitalización de les llingües minorizaes. Representa 44 comunidades llingüístiques en 18 estaos europeos. Iniciativa pol Asturianu ye miembru de plenu drechu de la organización, en representación de la llingua asturiana.