Nesti programa númberu nueve d'Iniciativa pol Asturianu nes ondes charramos col músicu Ricardo Saavedra del grupu del occidente asturianu Bacotexo y tuvimos presentes na presentación del llibru “La Chelita-El Salvador 1992” del dibuxante Ruma Barbero que mos faló del mesmu. Amás, Fernando Valle Roso ufrió’l so primer conciertu p’amosar al públicu’l so nuevu trabayu “Camín d’ayures” y el propiu cantante atendiónos al rematar y cuntónos delles cosuques al rodiu esti discu.

 

L’asignatura d’asturianu nes escueles pue desainiciase por cuenta de la nueva llei d’educación del ministru Wert. María Díaz, vocal d’enseñu d’Iniciativa desplicónos tolos detalles d’esti llaceriante asuntu. Una neña d’orixe rumanu y de namás diez años vien d’algamar el segundu puestu nun concursu de cuentos n’asturianu. Falamos cola so mayestra.

 

Podréis sentir asinamesmu una valoración de l'asociación Iniciativa pol Asturianu a la negativa del estáu pa poner los cartelos de les carreteres n'asturianu na voz del so presidente Inaciu Galán, que tamién mos cuntará'l so nuevu trabayu de terminoloxía n'asturianu nel campu del turismu.

 

Nueva collaboradora nel programa

 

A la voz del director del progama, Samuel Gradín, súmase agora tamién la de la maestra Ana María Suárez, profesora d'asturianu, cola que deprenderemos como cad día un poquiñín d’asturianu al final de cada programa.

 

Sienti'l programa n'Ivoox o na nuesa rede d'emisores: Radio Sele, Radio Parpayuela, Radio Ujo, AllerFM, Radio L.lena, Radio Kras, Radio Noreña, Radio Nava, Radio Alma (Bruseles)…