Cuasi un 60% de les families asturianes matriculen a los sos fíos na asignatura pese a les dificultaes puestes dende l’alministración asturiana

La diputada del Partíu Popular na Xunta Xeneral, Susana López Ares, fizo güei unes declaraciones que dende Iniciativa pol Asturianu nun podemos más que calificar como "llamentables". Pa esta organización, les declaraciones, nes qu'afirmó que "munchos padres tán quexándose" pola nueva situación de l'asignatura de Llingua Asturiana y Lliteratura n'Educación Primaria, son falses, yá que nun lo demuestra con nengún datu. Por embargu, el sofitu a l'asginatura nesti ciclu, supera'l 55% de los alumnos. Un datu que sí demuestra'l sofitu de los padres con datos reales.


 


Pa Iniciativa pol Asturianu ye claro que les families asturianes, de forma mayoritaria, quieren que los sos fíos estudien l'asturianu nes escueles. Un datu que supón tou un ésitu pa l'asignatura, pese a la falta de sofitu dende la Conseyería d'Educación, que nun fomenta l'avance del asturianu nel sistema educativu.


 


El PP quéxase de la nueva situación de l'asignatura, que pasa a tener una alternativa "Cultura asturiana" en llugar de la situación previa, na que les hores quedaben dedicaes al repás d'otres materies, ensin avanzar nengún conteníu. "Polo visto'l Partíu Popular quier más que los neños pierdan el tiempu a que deprendan la so llingua y/o la so cultura más cercana", espliquen dende Iniciativa pol Asturianu.


 


Pa Iniciativa pol Asturianu la nueva situación de l'asginatura nun ye la ideal. Yá que l'asignatura de Llingua Asturiana tendría de convertise nuna asignatura más, pues enseñando les dos llingües a los neños asturianos, ye la única forma de garantizar que nel futuru tengan la llibertá d'usar con normalidá castellán y asturianu, de forma correcta. Sicasí, esta nueva situación, garantiza la voluntariedá y evita lo que sí pasa na ESO y Bachilleratu, onde s'enfrenta al asturianu con otres llingües estranxeres, un verdaderu error, pues nun tien que tar reñío'l conocer lo propio con conocer otres llingües estranxeres.


 


Nun creemos dende la nuesa organización qu'esista un problema por esta nueva forma d'ufiertar l'asignatura de Llingua Asturiana, nun siendo porque sigue ensin garantizar que tolos alumnos salgan del sistema educativu asturianu conociendo bien el castellán y l'asturianu, lo qu’habría ser un oxetivu irrenunciable.