 10.48.54.png)
La organización Iniciativa pol Asturianu llamenta fondamente la non aprobación de la propuesta d'Ordenanza pal Usu del Asturianu nel Conceyu de Noreña presentada pol grupu políticu Conceyu Abiertu. La propuesta recibió’l sofitu de Frente de la Izquierda y la organización que la presentaba, a los que felicitamos pol so compromisu na normalización del idioma en Noreña. Nun podemos, por embargu, más qu’amosar el nuesu descontentu con IDEAS y PSOE pola so decisión de votar en contra, que significa votar contra'l futuru del asturianu.
La formación IDEAS lleva nel so programa la oficialidá del asturianu y el PSOE aprobó ordenances d’esti tipu n’otros conceyos como Xixón o Cangas, cuando cuntaben con mayoríes nos plenos, polo que ye inesplicable la so negativa.
Amás, ye especialmente sangrín el casu d’Unai Díaz Noval, conceyal socialista y secretariu xeneral de Mocedaes Socialistes d’Asturies, que la pasada fin de selmana aprobaba la defensa de la oficialidá como unu de los sos principios, polo qu’entendemos un votu en contra como una verdadera contradicción de la que tien que dar esplicaciones públiques. La so decisión fainos duldar de la veracidá del mandáu de defender la oficialidá del asturianu aprobáu pola militancia de la so organización va malapenes unos díes.
D’otru llau analizamos como daqué positivo la disponibilidá de tolos grupos, menos el PSOE, a aprobar unes ordenances pal usu del asturianu, y afalamos a toles formaciones a ponese al llabor pa consensuar un testu y aprobalu lo primero posible, yá que 9 conceyales amosaron la so disponibilidá a aprobar una ordenanza d’esti tipu, frente a los namás 3 del PSOE que se ñeguen a votar a favor.
