Iniciativa pol Asturianu quier felicitar públicamente a les Mocedaes Socialistes d'Asturies tres facese público que van incluyir la defensa de la oficialidá del asturianu ente los sos oxetivos como organización.

Asina, queremos tresmitir el nuestru apoyu a esta midida qu'a la fin entrará en consonancia cola opinión d'una mayoría bien importante de la sociedá asturiana y que vien a sumase a la vindicación d'otres organizaciones polítiques que lleven años demandándola.

Coles mesmes, aprovechamos pa facer un llamamientu a la Federación Socialista Asturiana pa que tomen exemplu y actúen en consecuencia al favor de los derechos llingüísticos ya intereses de los falantes d'asturianu y eonaviegu.

Dende Iniciativa pol Asturianu trabayaremos pa que'l consensu políticu énte la necesaria oficialidá seya cada vegada más ampliu y, poro, tenemos solicitao un conceyu con Unai Díaz Noval -Secretariu Xeneral de Mocedá nuevu- pa tresllada-y les nuestres inquietúes.