Iniciativa pol Asturianu participó esta fin de selmana en Santiago de Compostela na xunta xeneral de la Rede Europea d’Igualdá Llingüística (ELEN, poles sos siegles n’inglés). La delegación de la entidá tuvo encabeza por Iván Llera ya Inaciu Galán, presidente y vocal de Rellaciones Institucionales ya Internacionales respectivamente. Les diferentes entidaes mostraron el so interés pola situación de la llingua asturiana y el procesu de reforma del estatutu d’autonomía pa reconocer la oficialidá del idioma, consiguiendo d’esta manera el mesmu estatus llegal que’l restu de llingues españoles. Dambos recibieron numberoses amueses d’interés y solidaridá pol procesu d’oficialización de les llingües propies d’Asturies que se ta viviendo nesti momentu.
La xunta xeneral xeneral d’ELEN escoyó nueva directiva cola presidencia d’Elin Haf Gruffyd-Jones. La profesora galesa ye mui conocida nel ámbitu de los audiovisuales pa les llingües minorizaes y ye miembru del comité científicu del Protocolu de Garantía de los Drechos Llingüísticos. Formen parte de la dirección d’ELEN Ferran Suay (ACPV), Paul Bilbao (Kontseilua), Marcos Maceira (A Mesa), Mirjam Vellinga (Afûk), Domhnall MacNèill (CnaG), Conchúr Ó Giollagáin (Soillse), Ciarán Mac Giolla Bhéin (Comhairle), Padraig Ó Tiarnaigh (CnaG), Claudia (CNR), Anneli Sarhimaa (Univ. Mainz), Krisztina Sandor (EMNT), Rosa de les Neus Marco/Marga Payola (Plataforma).
La Llei Xeneral del Audiovisual foi un puntu importante que se trató nel alcuentru pol so impactu nes llingües minorizaes aprobando una resolución d’A Mesa demandando que s’asegurase la igualdá de toles llingües oficiales na futura Llei Audiovisual na que s’alcuentra trabayando’l Gobiernu d’España. Nel alcuentru, tamién se faló de la Llei Molac francesa, propuesta lexislativa entamada pol diputáu bretón Paul Molac, que ye una llei pa la protección y la promoción de les llingües rexonales. La xunta xeneral dio la bienllegada al prósimu Decenio Internacional de les Llingües Indíxenes 2022 – 2032, que foi proclamada por la Xunta xeneral Xeneral de la ONU.
Iniciativa pol Asturianu forma parte d’ELEN dende la so fundación nel añu 2011. Esta organización internacional ensin ánimu d’arriquecimientu trabaya pola promoción y protección de les llingües territoriales europees. Representa a una totalidá de 47 idiomes, con 168 organizaciones miembros de 24 estaos europeos. La xunta xeneral d’ELEN, qu’esti añu se celebró en Santiago de Compostela, foi posible col sofitu y la collaboración d’A Mesa pola Normalización Lingüística, la Universidade de Santiago de Compostela y el Museo do Pobo Galego.
