L’informe vien avaláu por filólogos profesores en diez universidaes de países como Xapón o Portugal

MADRID 01/06/2012. El presidente d'Iniciativa pol Asturianu, Inaciu Galán, tará esti llunes en Madrid pa presentar en mano ante la Real Academia Española (RAE) un informe tituláu “Definir el términu “asturianu” con xeitu. Informe sobre la presencia del vocablu “asturianu” y otros términos nos diccionarios normativos d’otres llingües”. Un trabayu que propon a la Real Academia Española que’l términu “asturianu” dexe de referise a “dialecto”, pa responder a la realidá ciéntifica y llegal, que dexa a les clares que l’asturianu ye un idioma.

 

Avalen esti informe un llistáu de profesores, que sigue creciendo, y qu’inclúi a más de 10 universidaes de países como Xapón o Portugal, a l’actual decana de la Facultá de Filosofía y Lletres de la Universidá d’Uviéu y a caderalgos y profesores.

 

Pa Iniciativa pol Asturianu ye innegable la necesidá de cambiar esta definición del Diccionario de la RAE, pues ye una cuestión de respetu a la realidá sociollingüística d’Asturies y del restu de los territorios asturfalantes.

 

Esti llunes 4 de xunu a les 12:00 de la mañana, Inaciu Galán entregará na sede de la Real Academia Española na cai Felipe IV, 4, de Madrid, esti informe y los avales xunto a una carta dirixida al Presidente de l’Academia. Atenderáse a la prensa a les puertes de la institución.