La organización llamenta’l votu en contra d’una iniciativa parllamentaria de Podemos qu’instaba al Gobiernu d’Asturies a reclamar al Ministeriu d’Educación la creación de la especialidá docente del idioma
Iniciativa pol Asturianu censura que PP, Ciudadanos y Vox rechacen a una midida que meyora les condiciones llaborales únicamente porque seya l’asignatura d’asturianu
La Comisión de Cultura, Política Llingüística y Turismu rechazó güei una Proposición Non de Llei del parlamentariu de Podemos Asturies, Rafael Palacios, que reclamaba la incorporación de los profesionales de l’asignatura de Llingua Asturiana nes plantilles orgániques, reclamar por parte del Gobiernu d’Asturies, al Ministeriu d’Educación, la creación de la especialidá docente d’asturianu y la obligación d’ufiertar l’asignatura d’asturianu en tolos niveles educativos y nes escueles d’idiomes.
A esta iniciativa parllamentaria sumáronse, amás del grupu proponente, Foro Asturies ya Izquierda Xunida, demientres que PSOE, PP, Ciudadanos y Vox votaren en contra. Nesi sentíu, Iniciativa pol Asturianu critica la hipocresía del PSOE y del PP cola especialidá docente de Llingua Asturiana. Nun ye de recibu qu’un partíu que lleva la oficialidá de les nueses llingües, como ye’l casu del PSOE, vote en contra d’una iniciativa parllamentaria d’esti tipu y qu’otru partíu que presentó una iniciativa parllamentaria similar va años vote agora en contra.
La organización de reivindicación llingüística aprovecha pa recordar que “esta ye una demanda hestórica de la comunidá educativa asturiana. Güei PSOE, PP, Ciudadanos y Vox sofitaron caltener una situación d’inxusta desigualdá llaboral col so votu en contra a esta Proposición Non de Llei de Podemos Asturies”. Amás, apuntaron tamién que toles midíes que recueye la iniciativa de Podemos Asturies tan incluyíes dientro de la Llei d’Usu, polo tanto, nun ye de recibu que partíos que defienden la Llei d’Usu voten en contra d’esta iniciativa.
Iniciativa pol Asturianu censura que PP, Ciudadanos y Vox voten rechacen midida que meyora les condiciones llaborales únicamente porque seya l’asignatura d’asturianu y recuerda que “nun ye esplicable que siendo una cuestión que xeneró yá delles votaciones unánimes de la Xunta Xeneral, y tando nel programa de cásique tolos partíos, nun se diera yá solución a esti problema que lleva xenerando dificultaes dende va más de trenta años”.
