La memoria del Foru de la ONU empobina a los poderes públicos a “adoptar ya implementar les midíes necesaries pa respetar, protexer y cumplir adecuadamente los drechos de les minoríes”
Iniciativa pol Asturianu va facer llegar a los grupos parlamentarios de la Xunta Xeneral y de les Cortes de Castiella y Llión estes conclusiones
Los díes 2 y 3 de mayu celebróse en Viena’l Foru Rexonal Europa-Asia Central de la ONU. Nel alcuentru participó Inaciu Galán, vocal de rellaciones institucionales d’Iniciativa pol Asturianu, pa desplicar la situación hestórica de la llingua asturianu y la realidá de la falta de drechos llingüísticos de los sos falantes qu’esiste anguaño en tolos territorios onde ta presente l’asturianu.
Sean Waller, coordinador internacional del programa del Foro de la ONU, fixo llegar a la organización les conclusiones y recomendaciones a les que se llegaron nel alcuentru. El documentu recueye, ente otres cuestiones, un llamáu a que “Tolos estaos deben garantizar los drechos étnicos, culturales, llingüísticos y relixosos de les persones pertenecientes a minorías nacionales o étniques, relixoses y llingüístiques como condición democrática básica y como principiu de gobernabilidá”.
Les conclusiones tamién empobinen a los poderes públicos a “adoptar ya implementar les midíes necesaries pa respetar, protexer y cumplir adecuadamente los drechos de les minoríes”. Nesi sen, hai que recordar la necesidá, pa cumplir esta recomendación, de recoyer na llexislación autonómica, nel Estatutu d’Autonomía, el reconocimientu de la oficialidá de les nueses llingües como una ferramienta de trabayu pa salvar l’idioma y como una manera de sumar y otorgar drechos a tola ciudadanía independientemente de la llingua que llibremente quiera utilizar.
L’informe tamién apunta a la falta de reconocimientu de los drechos de les minoríes qu’entá nun tienen garantizaos los sos drechos na llexislación vixente recoyendo claramente que “los mecanismos internacionales ya rexonales pertinentes deberíen alentar a los Estaos miembros a recoger los drechos humanos de les minoríes na práctica a nivel llocal o nacional dada la amplia evidencia de la falta d’implementación por parte de los estaos de les sos lleis internacionales y rexonales, obligaciones relacionaes colos drechos humanos de les minoríes”.
Amás, apunta claramente a “asegurar la protección y promoción de los drechos de les minoríes, eliminando cualesquier política que direuta o indireutamente contribuya a la discriminación o la intolerancia. Los gobiernos deben asegurar la protección de los drechos d’otras minorías dientro de la so xurisdición”.
Iniciativa pol Asturianu va facer llegar les recomendaciones algamaes nel Foru Europa-Asia de la ONU a los grupos parlamentarios de la Xunta Xeneral y de les cortes de Castiella y Llión, invitando a trabayar conxuntamente en llograr esos oxetivos.
2022 Europe-Central Asia Regional Forum Recommendations_FINAL
