“Facemos llegar la nuesa felicitación pol usu del idioma y esperamos que seya una manera de seguir ganando espacios de normalización”
“Dende Iniciativa pol Asturianu queremos qu’esi compromisu col idioma seya de manera habitual en toles estayes municipales del Conceyu de Xixón”
“Taremos sollertes pa que tamién se cumpla l’usu de la toponimia oficial nos diferentes entes y empreses públiques de Xixón”
XIXÓN, 06/05/2020. Iván Llera, presidente d’Iniciativa pol Asturianu, quiso facer llegar a la Policía Local de Xixón la so felicitación en nome de la organización pol usu del asturianu nes sos redes sociales p’aportar información sobre les normes nestos momentos d’andanciu del coronavirus. Llera comentó que “queremos facer llegar la nuesa felicitación pol usu del idioma y esperamos que seya una manera de seguir ganando espacios de normalización”.
Va unos díes ELEN, Rede Europea d’Igualdá Llingüística, na que participa Iniciativa pol Asturianu facía un llamáu a nivel européu pa reclamar la presencia de los diferentes idiomes pa informar sobre la pandemia. “Allégranos comprobar que l’asturianu utilizóse pa informar sobre les normes pa estos díes de confinamientu y eso nun supunxo nengún problema”.
El presidente de la organización apuntó que “dende Iniciativa pol Asturianu queremos qu’esi compromisu col idioma seya de manera habitual en toles estayes municipales del Conceyu de Xixón. Queremos que, de cara’l futuru, por exemplu, en nueves rotulaciones de vehículos y na nueva comisaría, l’asturianu y la toponimia oficial tean presentes con normalidá”.
Iván Llera terminó diciendo que “taremos sollertes pa que tamién se cumpla l’usu de la toponimia oficial nos diferentes entes y empreses públiques de Xixón”.
