Iniciativa pol Asturianu estrena nel so portal web un apartáu dedicáu a información llingüística dedicáu a profesionales de la información de diferentes muérganos, empreses o servicios de comunicación.
El nuevu espaciu de la páxina del colectivu de reivindicación llingüística agrupa en tres bloques (llexislación, toponimia y recursos) la diferente información relativa a cuestiones llingüístiques.
Nesi sen, la organización entama faciendo referencia nel so articuláu llexislativu a la normativa estatal, recordando que l’artículu 3 de la Constitución Española, correspondiente a la diversidá llingüística, afita que “«les demás llingües españoles han ser tamién oficiales nes respectives Comunidaes Autónomes acordies colos sos Estatutos. D’igual manera se recueye que les distintes modalidaes llingüístiques son un «patrimoniu cultural» qu’ha ser oxetu d’especial «respetu y protección». El colectivu recuerda tamién nesti capítulu que l’ordenamientu xurídicu autonómicu tamién ampara al asturianu como ye’l casu del Estatutu d’Autonomía, que fai referencia a la necesidá de protexer al asturianu, y la Llei d’Usu y Promoción del Asturianu. Esta última normativa regula dende esi momentu’l drechu de la ciudadanía a emplegar l’asturianu y la obligación de l’alministración autonómica a velar por qu’estos drechos se cumplan.
La normativa europea tamién defende la pluralidá llingüística asturiana nel marcu de la Carta Europea de les Llingües Rexonales o Minoritaries, que foi ratificada por España nel añu 2001.
Na sección dedicada a toponimia, la entidá enllaza a la páxina web de la Dirección Xeneral d’Acción Cultural y Normalización Llingüística onde hai un buscador de toponimia. Esti restolador recueye los nomes oficiales de los llugares de cada conceyu. Esiste amás otru buscador desendolcáu por Softastur, qu’agrupa d’igual manera información sobre los cambeos na toponimia.
Na parte dedicada a recursos, apaecen amás de los anteriores el Diccionariu de la Llingua Asturiana (DALLA); el Lexicón abiertu de la llingua asturiana, un conxuntu estructuráu de preseos llingüísticos y la páxina formativa que lleva’l títulu ‘Deprendi Asturianu’.
Al traviés d’esta nueva publicación na web, l’asociación pretende facilitar el llabor a los trabayadores de la comunicación y animar nel usu de los nomes tradicionales y del asturianu nes diferentes campañes, comunicaciones o informaciones que puedan surdir.