El pidimientu del Conseyu d’Europa pa que se declare la oficialidá del asturianu foi la Meyor Noticia pal Asturianu del añu 2024. Ye la opción más votada na consulta entamada por Iniciativa pol Asturianu. D’esta manera, la ciudadanía valoró’l sofitu reflexáu nun informe d’evaluación asoleyáu en setiembre pola institución sollertando de la situación de les llingües minorizaes del continente. El documentu recueye de manera esplícita una referencia a la previsión constitucional reclamando que se «den pasos pal reconocimientu del asturianu como llingua oficial nel Estatutu d’Autonomía del Principáu d’Asturies».
Ente les noticies más votaes asitióse tamién l’apueste por implementar la llingua propia na etapa preescolar d’Educación Infantil. Esta foi una reclamación constante d’Iniciativa pol Asturianu pa procurar la tresmisión xeneracional del idioma nesti primer contactu educativu. La tercera información con más sofitos foi la de la decisión de puntuar el conocimientu del asturianu dientro de les oposiciones na comunidá autónoma.
Otres novedaes pal idioma del fináu 2024 qu’algamaron munchos votos fueron l’apaición de 3.000 poemes de Fernán Coronas, la incorporación del asturianu a la ufierta formativa de les Escueles d’Idiomes y la decisión del Ministeriu de Cultura d’incluyir programación en llingua asturiana dientro d’esti departamentu.
Iniciativa pol Asturianu fixo públicu esti vienres el resultáu de la votación popular, que en esta edición volvió a ser un ésitu de participación durante los 10 díes de consulta. L’asociación agradez la collaboración y participación a tola ciudadanía que s’implicó na escoyeta popular que cumplió doce años de recoyer bones noticies pa la llingua asturiana.
