Iniciativa pol Asturianu reclama que se tenga en cuenta l’asturianu na glorieta nueva que va reordenar el tráficu ente l’AS-17 y l’AS-381 que xunen les llocalidaes de Llugones y Siero. La infraestructura qu’entama’l Conceyu de Siero inclúi un mapamundi con una interpretación del globu terráqueu visible pa los viandantes y un lletreru col mensaxe de ‘Save your planet, cuida tu planeta’.
La organización de reivindicación llingüística reclama al equipu de gobiernu d’Ángel García qu’incluya la presencia del asturianu nel lletreru, pa cuntar amás de col inglés y el castellanu, cola llingua propia. Iniciativa pol Asturianu quier que les pallabres ‘Cuida’l to planeta’ tean presentes n’igualdá de condiciones. Pa ello, la entidá recuerda que la inclusión del idioma propiu nun xeneraría un costu adicional na instalación, pudiendo involucrar al Serviciu de Normalización Llingüística de Siero na xera. La incorporación del asturianu nesti mensaxe contribuiría a la so visibilización y normalización, xenerando un sentimientu d’arraigu y concienciación sobre los valores medioambientales que pretenden inculcar.
La entidá recuerda qu’anque la llingua asturiana nun ye oficial, sí ye una llingua protexida tanto na Constitución Española que fala claramente que les demás llingües serán oxetu d’especial protección. Del mesmu mou, l’Estatutu d’Autonomía y la Llei d’Usu afiten la utilización de la llingua asturiana nesti tipu d’intervenciones.
Recordatoriu de la toponimia oficial
Nel escritu presentáu a la municipalidá sierense, la entidá afala tamién a respetar la toponimia oficial del conceyu na señalética. Iniciativa pol Asturianu recuerda que Siero recuperó la toponimia tradicional nel añu 2009 y que la so utilización vien recoyida na Llei d’Usu y Promoción del Asturianu.
