XIXÓN, 13/04/2021. Dempués de conocese que los títulos del B2 de llingua asturiana que s’algamaron na convocatoria d’ochobre del añu 2020 nun van a puntuar n’oposiciones, Iniciativa pol Asturianu reclama a la Conseyería d’Educación la reconocencia oficial d’estos títulos.

Pa la organización, otorgar esa valoración ye una manera más de dar valor al conocimientu y aprendizaxe del idioma, amás de llograr la igualdá col restu de llingües con titulación oficial del Marcu Européu. Amás, esta homologación de los títulos otorgaos podría garantizar una normalización de la llingua al xunir el conceptu d’asturianu col conceptu de competencia llaboral. D’esta forma, dar esa importancia a los títulos oficiales va xenerar confianza ya interés, nun solo nos opositores, sinón tamién nes families d’alumnáu pudiendo provocar un incrementu nes matrícules d’asturianu a lo llargo de tola etapa educativa.

Resulta incomprensible que los títulos puedan ser otorgaos al traviés d’una convocatoria oficial de la Conseyería d’Educación y de la Universidá d’Uviéu pero que, al mesmu tiempu, la mesma nun reconozca nin dea valor a los propios títulos qu’entama la propia Conseyería. Ún de los aspectos más interesantes d’alcanzar esti nivel pa la llingua asturiana ye llograr esa certificación oficial y esa valoración nuna oposición pública. Ye dicir, cuntar con esa competencia llingüística tien que traducise en que seya valorada positivamente.

Por too ello, Iniciativa pol Asturianu pide una solución urxente pa la valoración oficial de los títulos qu’entama la propia Conseyería d’Educación, y un trabayu alministrativu y normativu pa llograr esa certificación oficial que garantice’l valor del títulu.