Iniciativa pol Asturianu entama esti llunes, 3 de xineru, la votación de la ‘Meyor noticia pal asturianu en 2022’. D’esta manera, la organización pretende escoyer, pente medies d’una votación popular n’internet, la meyor noticia pal idioma nel pasáu añu 2022.
La organización apuntó que “tamos mui contentos porque esta iniciativa estrenóse nel añu 2013 y cumple 10 años recoyendo bones noticies pal idioma. Cada exerciciu añal que pasa va medrando’l númberu de participantes y la cantidá de noticies positives pal idioma. Tamién val pa facer un repás a tol llabor d’Iniciativa pol Asturianu y pa comprobar cómo añu a añu la llingua asturiana tien una repercusión positiva nos medios”.
Pa Iniciativa pol Asturianu esta votación ye importante porque “con esta campaña pretendemos facer llegar a la ciudadanía asturiana delles bones noticies pal nuesu idioma. Amás, dende Iniciativa pol Asturianu queremos recoyer lo positivo d’esti 2022 pal asturianu y treslladar que la llingua asturiana sigue ganando presencia nes instituciones y normalidá na sociedá”.
Los y les participantes pueden escoyer ente un total de 17 bones noticies pal asturianu de diferente tipu d’un total de 33. La votación entama esti llunes 3 de xineru y va acabar el vienres 13 d’esti mes. Amás, los y les participantes van participar nun sortéu d’un llote de llibros n’asturianu.
