Xicu Ilesies, el ciudadanu al que se-y torgó’l drechu de camudar de manera oficial el so nome y apellíu al asturianu, presentó na mañana de güei nel xulgáu de La Pola Llaviana un escritu d’oposición a la resolución de la Dirección Xeneral de Seguridá Xurídica y Fe Pública que-y negó la posibilidá de tornar el so nome y l’apellíu a la llingua asturiana.
Resulta inimaxinable que nel momentu nel que vivimos con tantos avances na normalización llingüística del idioma, una persona tenga que vese na situación d’acudir a la xusticia pa reclamar un cambiu de nome. El casu de Xicu Ilesies ye un nuevu exemplu de la variedá de casos de discriminación llingüística que venimos denunciando dende la nuesa fundación nel añu 2011.
El ciudadanu, de manera inédita, tuvo que presentar una semeya del nome qu’apaez nel so buzón de casa, una esquela de defunción del proxenitor, correspondencia recibida col so nome n’asturianu, muestra de perfiles en redes sociales, testimonios de responsables del Conceyu, una invitación de boda, la orla de la Universidá d’Uviéu y copies de los DNI de persones coles que comparte, per un llau, el nome y con otra l’apellíu.
Iniciativa pol Asturianu vuelve a faer públicu’l so sofitu a Xicu Ilesies que con esti trabayu ta llogrando visibilizar una situación de discriminación llingüística xenerada pola falta de reconocimiento de la oficialidá de la llingua asturiana. El casu de Xicu Ilesies ye una situación na que rescampla, una vegada más, que ye necesaria la declaración d’oficialidá nel Estatutu d’Autonomía del Principáu d’Asturies pa llograr que tola ciudadanía, independientemente de la llingua que fale, tenga los mesmos drechos reconocíos.
Amás, la organización robló tamién esi escritu d’oposición que presentó l’afectáu y nel que se reclama’l poner fin a esti casu de discriminación llingüística. La entidá recalca que “vamos a trabayar de manera conxunta con Xicu Ilesies pa que llogre’l so oxetivu de cuntar col so nome y apellíu n’asturianu”.
Iniciativa pol Asturianu recuerda que cambiar el nome al asturianu ye un drechu que se puede exercitar de manera llibre. Lo primero ye solicitar un certificáu a l’Academia de la Llingua Asturiana, después ye necesario facese con un certificáu d’empadronamientu del conceyu. Darréu, pidir una copia del certificáu de nacencia nel Rexistru Civil. El pasu final, enantes de solicitar el cambiu del DNI, ye dir al Rexistru Civil correspondiente colos trés certificaos, la instancia y una fotocopia del DNI. El trámite ‘Adaptación del nome al idioma de la CA’ ye inmediatu y nun tien costu nengún.
